Gair mukammal

Ek pakki sadak par safar tay karo aur janoge vahan se kya uthaaya

Farrate se nikalti gadiyan ke bharbharate horns ka shor

Jo kadam dhang se rakhne bhi na dega

Aur ek kinare par dabake sadak hathiya lega

Dil chahega ek aisa kinaara mil jaye

Koi bench,ek cement ki slab jahan baith kar kuch sukoon ki saanse le li jayen

Par har taraf umadte log nazar ayenge

Nazar uthaoge to sainkdon bijli ke tar zehen uljhayenge

Unke khambo se jhoolte hue beshumaar ishtihaar

Jab ghar pahonchoge to thakaavat zyada mehsoos hogi

Paanv par kasa joota jaise haanf jayega

Aur pasine se uski khaal mehekne lagegi

Dhool ki ek mahin parat uski chamak dhak degi

Aur vo iske alaava kuch bhi saath lekar na ayega

sookha,banjar sa

ek hafz se bhare kamre ka ek kinaara pakad lega

aur apni dhalti umr ke malaal mein so jayega

Ek kacchi sadak par yahi safar karke dekhna

aisa rasta jaise hare ghane balon ke beech kisi ne maang nikal kar baal do taraf kar diye hon

Aaram se ek ek kadam apne padne ka maza lega

Dheere dheere chal rahe hoge aur age chalti bailgaadi tab bhi tez chalne ka ehsaas dilayegi

raste mein ek keechad ka padav ayega

aur ek bacche ki tarah ek paanv par sigdi khelte hue

vahan jame pattharon ke upar se nikal jaoge

jahan dil chahega vahan baith jaoge

jis ped ki chaanv ko chaho bistar bana loge

shor sirf hava ki sarsaraahat ka hoga

aur usme jhilmilaati bail ke gale mein bandhi ghanti ki avaaz

nazar uthayoge to kaahili se jhoolte bilji ke taar

aur unpar baitha parindo ka ambaar

ghar pahonchoge to joota safar ke husn ki gavahi dega

apne daaton mein ghaans ke reshe aur chote chote patthar dabaye

keechad mein ranga us bacche ki tarah dikhega

jise uski maa ne aangan mein akela chod diya ho

aur apne kaam mein lag gayi ho

lagega bachpan abhi shuru hua hai

kabhi na khatm hone ke liye .